【拖手仔之選】真心好味小食店

這是每位愛孩子的爸媽
都需要擁有的親子遊Guidebook

Cover-01

老實講,好多人龍食店被吹捧到幾好食幾好食,直情以為是天神美食跌落凡間一樣,有時真係排完長龍得啖笑。例子包括屏山X嫂冰室,食過並不「番尋味」,小編覺得斜對面無名小檔的「豬骨粥」更正斗啦。 

好喇,今次小編M與小編K嚴選各區部分好味小食店,準則好主觀:就是用我倆的「平民味蕾」,揀出「翻頭再食指數高」之選。唔HARDSELL,無收錢,真心選。

【排名不分先後】

NO. 1 雞蛋仔——紅磡雞蛋仔

IMG_1932 IMG_1937 IMG_1941

小編M和小編K縱橫雞蛋仔界多年,食過雞蛋仔N咁多底,知道雞蛋仔最緊要係夠蛋味,然後火喉要啱啱好,太硬太脆唔得,放太耐凍了軟了又失口感。簡單來說,就是要外脆內軟,兼聞起來香噴噴,食起來熱呼呼!這間由老闆吳先生主理的小店,不單止雞蛋仔馳名,還有好多不同款的港式班戟,如熱門的肉鬆班戟和芒果班戟等,餡料夠豐富,價格非常相宜!最難得的是,雞蛋仔老闆為人友善親切、刻苦耐勞,真誠待客,最近《飲食男女》訪問了他,噢,人龍一定更長了!

不敢說是全港最好食(因為沒食勻全部),但想必三甲必入!(以前筲簧灣東大街間低調高手都好好食,不過多人食後又失了真;另外,每晚十時過後,在朗屏港鐵站天橋擺賣的木頭車仔檔都好好味!尤其是格仔餅)

地址:紅磡大沽街寶利閣2號鋪
人龍指數:5星(5星為滿分)
溫馨提示:吳伯伯坐陣先排啦;如果由他人操刀,會無咁好食。

####

NO. 2  豆腐花——亞婆豆腐花

R0028380 R0028376 R0028374

位於大埔墟的亞婆豆腐花每日新鮮製造,口感滑溜溜,入口即溶。小編K身為大埔友,由細食到大,覺得凍豆花的豆味不及熱豆花濃郁,若是喜愛黃豆味濃的,最好食熱的吧!

小編M:我超中意食豆花,食勻港九新界,這間好食過好多所謂「山水豆花」!(九龍城拍過《狂舞派》果間老店都大大比下去啊)幾蚊碗,但好有滿足感!不過因為附近是菜檔,一排長龍就讓人打退堂鼓。

 地址: 大埔大光里2A號
人龍指數:3星(5星為滿分)

####

NO. 3 芝心多——SNACK BAR席前

IMG_1755 IMG_1760 IMG_1764

筲箕灣東大街出晒名是食街,要在一條有幾十間食肆林立的長街之中突圍而出,真的要有番一兩道板斧至得。由老闆身兼大廚的「席前」,採家庭式經營FEEL,以前在天后經營,走街坊親民路線,儲下一堆熟客仔,後來搬到東大街。早大半年,由於業主加租一度停業,後來才由街心搬到街尾,在現址繼續開業。主廚得老闆一人,所以要密密煮無停手,現在都鮮有空閒同客人打牙骹。食物以日式串燒為主,另有日式+港式FUSION炒麵飯,都係水準之作。不過講到最驚喜的必食推介,就是「芝心多」,焗好的麵包鬆軟又香口,咬落去,嘩,是半溶的芝士,沾上少少煉奶來吃,好味到唔停得口!!!卡路里超高吧~~但邪惡之物向來最美味。小編M覺得,用來當做飯後甜品,簡直一流;每次都謹記,要預留胃部少少位置去安置它!

地址:筲箕灣東大街169號地下
人龍指數:不太多人,通常有位。
溫馨提示:若店內人多,老闆就未必肯整喇,因為製作需時呢!

####

NO. 4 炸雞髀——三多

IMG_7451 IMG_7453 IMG_7457

位於大埔墟的三多炸得一手好雞髀,雞皮沾滿麵包糠,脆卜卜,無敵熱氣但好味到暈。小編K食雞髀多年,深知道炸脾最高境界是:雞皮香口好味,雞肉又入味,而且入口時唔覺滿口油味。三多炸脾已經達到這種度,最絕的是表面灑上了辣椒粉(怕辣就食原味唔辣啦),一口咬落,辣椒粉糅著雞肉,簡直係邪惡之最,令人食完即刻就想食。除了炸髀外,還有無咁熱氣的油髀,和炒腸粉。

 

地址:大埔翠樂街11號美豐花園1號地鋪
人龍指數:開枱坐低食,唔太多人,只須等一陣。
溫馨提示:舊鋪其實仲好食!不如去舊鋪:大埔北盛街29A號地下(不過舊鋪少位,無冷氣)

####

NO. 5 腸粉——四眼仔腸粉

WAI_8594 WAI_8598 WAI_8591

平民美食多的是的聯和墟,當中以小店「四眼仔腸粉」出售6港元四條腸粉平盡全墟!白腸粉既平且滑,食到最後不會黏底,性價比超高。另外有售魚蛋、燒賣、粉果、牛肉,才2港元起就有交易,全部小食都是小朋友的最愛,又飽肚,返學前做早餐,放學後做TEA,一流。

平平滑滑熱呼呼,價錢好像停留在幾十年前。

 地址:粉嶺和隆街40B號地下
人龍指數:2星(5星為滿分)(雖然時有長龍,但流動快)

####

NO. 6 蛋牛治——漢興茶檔

R0030111 R0030119 R0030123

漢興茶檔是聯合墟街坊蒲㸃,小店細細,餐牌菜式甚至只有幾款煎蛋、多士、公仔麵選擇,但逢早、午餐必定滿座!茶檔主打是厚厚的鹹牛肉蛋餅,表面煎得金黃,鹹牛肉加雞蛋口感比淨肉餅滑身得多,啖啖咸牛肉齒夾留香,配多士或公仔麵都是上佳港式美食!

小編K:本K向來被喚做食肉獸,自己把一大碟的鹹牛肉蛋食清光,但其實普通人食有點會「膩」,建議兩三個人分享同食。(蛋鹹牛肉加多士,分開上,食法由你話事,售18港元。)

小編M:以前住粉嶺,家人是其忠實粉絲!搬家以後,家人經常吵著要去食,即使千里迢迢駕車去吃也願意。

地址:粉嶺聯和墟聯興街3號地下
人龍指數:平日唔算多人,星期六才比較擠擁。只開到下午三時,星期日休息不營業。

####

NO. 7 咖喱魚蛋——時來食坊

IMG_1821 IMG_1818 IMG_1830

掌頭般大的魚蛋,雖然大,但依然彈牙!幾款醬汁選擇:咖喱、沙嗲、麻辣、甜辣、原味……惹味抵食。小店雖然以炸物出名,連蔡瀾都讚過,但小編K認為其他食品都只是一般而已。

小編M:好多魚蛋檔賣的魚蛋都沒有十幾年前那麼好味了!可能很多都是從內地大量入口,有時咬落一口粉,有時咬落腥腥地,有時無彈力……

 地址:長洲新興後街 150 號地下
人龍指數:1;長洲更出名的其實是甘永泰,不過是炸魚蛋;然而甘永泰閒閒地要排半小時;時來食坊幾乎不用排隊。

####

NO. 8 砵仔糕——坤記糕品

R0032930 R0032860 R0032856

每晚先將半新米浸泡,翌日凌晨2am起來磨米,把磨出的新鮮米漿作食材製作傳統糕品,這是「坤記糕品」的老闆們自少從爸爸處學會的秘訣與堅持!
老闆傅先生兄弟,自60年代起跟在爸爸身邊,在深水埗街頭擺檔賣糕,後終於開店,兄弟從此晝夜分工、輪流合作製糕,堅持用新鮮食材,連麵粉都不買現成而要自家磨製!小店擺滿白糖糕、芝麻糕、紅豆糕、鬆糕、砵仔糕……樣樣都是招牌!糕品不加添加劑及防腐劑,小編M認為最好食是九層芝麻糕;小編K覺得是白糖糕。

地址:深水埗福華街115-117號北河商場地下10號舖
人龍指數:1

####

NO. 9 雪糕格仔餅——BB雞蛋仔

20150908_175100 20150908_175003 20150908_174335

位於柴灣的「BB雞蛋仔」最大熱的不是雞蛋仔,而是雪糕格仔餅,小編K最愛雲呢嗱。除外,仍有抹茶、朱古力、芒果,和曲奇合種味道,即叫即整,熱騰騰的格仔餅,配上凍冰冰的雪糕,味道一流!
這裡的格仔餅口感以煙靭為主,若喜歡鬆脆的口感,可向事先向店員提出。一大份雪糕,加上格仔餅,只需$18,足夠兩個人分享,店家更窩心地可切半上,暖爆食客心。
小編M有兩個大叔朋友在柴灣區工作,都好中意食;不過他們說,要避開放學時間的高峰,不然就要兩個大叔混入少女人群中,有點尷尬!

地址:柴灣道350號樂軒臺地下413號舖
人龍指數:2(放學時間,吸引好多中學生)

福仔

福仔

天不怕地不怕只怕無得去玩的喵星人。有點壞心眼,喜歡作弄柴犬笑笑,但很疼鍚棉棉(主人BB)。討厭小朋友嘈吵、撒野和放聲大哭,更怕怪獸家長,會向他們發動反白眼和碎碎念攻擊!
福仔