老實講，好多人龍食店被吹捧到幾好食幾好食，直情以為是天神美食跌落凡間一樣，有時真係排完長龍得啖笑。例子包括屏山X嫂冰室，食過並不「番尋味」，小編覺得斜對面無名小檔的「豬骨粥」更正斗啦。 

好喇，今次小編M與小編K嚴選各區部分好味小食店，準則好主觀：就是用我倆的「平民味蕾」，揀出「翻頭再食指數高」之選。唔HARDSELL，無收錢，真心選。

【排名不分先後】

NO. 1 雞蛋仔——紅磡雞蛋仔

小編M和小編K縱橫雞蛋仔界多年，食過雞蛋仔N咁多底，知道雞蛋仔最緊要係夠蛋味，然後火喉要啱啱好，太硬太脆唔得，放太耐凍了軟了又失口感。簡單來說，就是要外脆內軟，兼聞起來香噴噴，食起來熱呼呼！這間由老闆吳先生主理的小店，不單止雞蛋仔馳名，還有好多不同款的港式班戟，如熱門的肉鬆班戟和芒果班戟等，餡料夠豐富，價格非常相宜！最難得的是，雞蛋仔老闆為人友善親切、刻苦耐勞，真誠待客，最近《飲食男女》訪問了他，噢，人龍一定更長了！

不敢說是全港最好食（因為沒食勻全部），但想必三甲必入！（以前筲簧灣東大街間低調高手都好好食，不過多人食後又失了真；另外，每晚十時過後，在朗屏港鐵站天橋擺賣的木頭車仔檔都好好味！尤其是格仔餅）

地址：紅磡大沽街寶利閣2號鋪
人龍指數：5星（5星為滿分）
溫馨提示：吳伯伯坐陣先排啦；如果由他人操刀，會無咁好食。

＃＃＃＃

NO. 2  豆腐花——亞婆豆腐花

位於大埔墟的亞婆豆腐花每日新鮮製造，口感滑溜溜，入口即溶。小編K身為大埔友，由細食到大，覺得凍豆花的豆味不及熱豆花濃郁，若是喜愛黃豆味濃的，最好食熱的吧！

小編M：我超中意食豆花，食勻港九新界，這間好食過好多所謂「山水豆花」！（九龍城拍過《狂舞派》果間老店都大大比下去啊）幾蚊碗，但好有滿足感！不過因為附近是菜檔，一排長龍就讓人打退堂鼓。

 地址： 大埔大光里2A號
人龍指數：3星（5星為滿分）

＃＃＃＃

NO. 3 芝心多——SNACK BAR席前

支持我們繼續營運

「拖手仔去街GUIDE」旅遊網一直由編輯K和M自掏腰包經營，由2016年至今已經幾年，背後並無任何BACKUP。亦由於我們不想太HARDSELL和賣廣告，一直以來極少接鱔稿JOB。

如覺得我們的資訊又用，想給我們一點鼓勵，請以PAYME或FPS打賞（SCAN QR CODE）。多多益善，少少無拘。

Payme: https://payme.hsbc/guideguidehk

FPS ID（轉數快）：0718742（姓名 HUI S*** M**）

筲箕灣東大街出晒名是食街，要在一條有幾十間食肆林立的長街之中突圍而出，真的要有番一兩道板斧至得。由老闆身兼大廚的「席前」，採家庭式經營FEEL，以前在天后經營，走街坊親民路線，儲下一堆熟客仔，後來搬到東大街。早大半年，由於業主加租一度停業，後來才由街心搬到街尾，在現址繼續開業。主廚得老闆一人，所以要密密煮無停手，現在都鮮有空閒同客人打牙骹。食物以日式串燒為主，另有日式+港式FUSION炒麵飯，都係水準之作。不過講到最驚喜的必食推介，就是「芝心多」，焗好的麵包鬆軟又香口，咬落去，嘩，是半溶的芝士，沾上少少煉奶來吃，好味到唔停得口！！！卡路里超高吧～～但邪惡之物向來最美味。小編M覺得，用來當做飯後甜品，簡直一流；每次都謹記，要預留胃部少少位置去安置它！

地址：筲箕灣東大街169號地下
人龍指數：不太多人，通常有位。
溫馨提示：若店內人多，老闆就未必肯整喇，因為製作需時呢！

＃＃＃＃

NO. 4 炸雞髀——三多

位於大埔墟的三多炸得一手好雞髀，雞皮沾滿麵包糠，脆卜卜，無敵熱氣但好味到暈。小編K食雞髀多年，深知道炸脾最高境界是：雞皮香口好味，雞肉又入味，而且入口時唔覺滿口油味。三多炸脾已經達到這種度，最絕的是表面灑上了辣椒粉（怕辣就食原味唔辣啦），一口咬落，辣椒粉糅著雞肉，簡直係邪惡之最，令人食完即刻就想食。除了炸髀外，還有無咁熱氣的油髀，和炒腸粉。

地址：大埔翠樂街11號美豐花園1號地鋪
人龍指數：開枱坐低食，唔太多人，只須等一陣。
溫馨提示：舊鋪其實仲好食！不如去舊鋪：大埔北盛街29A號地下（不過舊鋪少位，無冷氣）

＃＃＃＃

NO. 5 腸粉——四眼仔腸粉

平民美食多的是的聯和墟，當中以小店「四眼仔腸粉」出售6港元四條腸粉平盡全墟！白腸粉既平且滑，食到最後不會黏底，性價比超高。另外有售魚蛋、燒賣、粉果、牛肉，才2港元起就有交易，全部小食都是小朋友的最愛，又飽肚，返學前做早餐，放學後做TEA，一流。

平平滑滑熱呼呼，價錢好像停留在幾十年前。

 地址：粉嶺和隆街40B號地下
人龍指數：2星（5星為滿分）（雖然時有長龍，但流動快）

＃＃＃＃

NO. 6 蛋牛治——漢興茶檔

漢興茶檔是聯合墟街坊蒲㸃，小店細細，餐牌菜式甚至只有幾款煎蛋、多士、公仔麵選擇，但逢早、午餐必定滿座！茶檔主打是厚厚的鹹牛肉蛋餅，表面煎得金黃，鹹牛肉加雞蛋口感比淨肉餅滑身得多，啖啖咸牛肉齒夾留香，配多士或公仔麵都是上佳港式美食！

小編K：本K向來被喚做食肉獸，自己把一大碟的鹹牛肉蛋食清光，但其實普通人食有點會「膩」，建議兩三個人分享同食。（蛋鹹牛肉加多士，分開上，食法由你話事，售18港元。）

小編M：以前住粉嶺，家人是其忠實粉絲！搬家以後，家人經常吵著要去食，即使千里迢迢駕車去吃也願意。

地址：粉嶺聯和墟聯興街3號地下
人龍指數：平日唔算多人，星期六才比較擠擁。只開到下午三時，星期日休息不營業。

＃＃＃＃

NO. 7 咖喱魚蛋——時來食坊

掌頭般大的魚蛋，雖然大，但依然彈牙！幾款醬汁選擇：咖喱、沙嗲、麻辣、甜辣、原味……惹味抵食。小店雖然以炸物出名，連蔡瀾都讚過，但小編K認為其他食品都只是一般而已。

小編M：好多魚蛋檔賣的魚蛋都沒有十幾年前那麼好味了！可能很多都是從內地大量入口，有時咬落一口粉，有時咬落腥腥地，有時無彈力……

 地址：長洲新興後街 150 號地下
人龍指數：1；長洲更出名的其實是甘永泰，不過是炸魚蛋；然而甘永泰閒閒地要排半小時；時來食坊幾乎不用排隊。

＃＃＃＃

NO. 8　砵仔糕——坤記糕品

每晚先將半新米浸泡，翌日凌晨2am起來磨米，把磨出的新鮮米漿作食材製作傳統糕品，這是「坤記糕品」的老闆們自少從爸爸處學會的秘訣與堅持！
老闆傅先生兄弟，自60年代起跟在爸爸身邊，在深水埗街頭擺檔賣糕，後終於開店，兄弟從此晝夜分工、輪流合作製糕，堅持用新鮮食材，連麵粉都不買現成而要自家磨製！小店擺滿白糖糕、芝麻糕、紅豆糕、鬆糕、砵仔糕……樣樣都是招牌！糕品不加添加劑及防腐劑，小編M認為最好食是九層芝麻糕；小編K覺得是白糖糕。

地址：深水埗福華街115-117號北河商場地下10號舖
人龍指數：1

＃＃＃＃

NO. 9　雪糕格仔餅——BB雞蛋仔

位於柴灣的「BB雞蛋仔」最大熱的不是雞蛋仔，而是雪糕格仔餅，小編K最愛雲呢嗱。除外，仍有抹茶、朱古力、芒果，和曲奇合種味道，即叫即整，熱騰騰的格仔餅，配上凍冰冰的雪糕，味道一流！
這裡的格仔餅口感以煙靭為主，若喜歡鬆脆的口感，可向事先向店員提出。一大份雪糕，加上格仔餅，只需$18，足夠兩個人分享，店家更窩心地可切半上，暖爆食客心。
小編M有兩個大叔朋友在柴灣區工作，都好中意食；不過他們說，要避開放學時間的高峰，不然就要兩個大叔混入少女人群中，有點尷尬！

地址：柴灣道350號樂軒臺地下413號舖
人龍指數：2（放學時間，吸引好多中學生）