不要去羨慕～～不要去妒忌～～真的好想來到這嬉戲～～

在搜集18區好玩親子玩樂點的時候，笑笑福仔同棉棉都發覺，喂，點解將軍澳的親子設施，又多又新又好玩！室內戶外乜都有！令並非住在當區的他們都好羨慕啊！唔怕，可以搵日跨區玩盡佢！

必去點1：單車館公園　戶外大草地+室內遊戲室  全部都新簇簇

由港鐵坑口站出發，步行幾分鐘，就會見到單車館公園。戶外區有極限運動場、模型船池，最吸引仲係大草地上有靚靚裝置（可做拍照背景）同埋新式兒童遊樂場——有個轉轉架好好玩！入去單車館，運動主場如果冇單場比賽或者操練，就會變成羽毛球場，可book場打波；而兒童遊戲室的主題係「極限運動」。呢區的兒童遊戲室全部又新又大，仲有三個！媽呀，叫其他區情可以堪呢～～

交通：坑口站B出口（較近）或將軍澳站A出口
鄰近大型商場：南豐廣場商場、將軍澳廣場商場
詳情：http://www.guideguide.hk/?p=5887

必去點2：將軍澳游水池　直情好似去了水上樂園

夏日炎炎，中意游水的，點可能唔去將軍澳泳池呀！康文署轄下的泳池中，將軍澳泳池堅係啱小朋友，因為除了有主池、訓練池、習泳池、跳水池、戲水池之外，仲有兩個大大的嬉水池啊！以飛機和飛航船為設計主題，COOL！仲有個超級巨型大水桶，會失驚無神一盤冷水兜頭淋，COOL COOL! 最正的，仲有四迴轉滑水梯，成四、五層樓（但小朋友要留意，如果唔夠高可能玩唔到！），SUPER COOL!

地點：將軍澳運隆路9號
開放時間：
夏季（4月至10月）
第一節：上午6時30分至中午12時
第二節：下午1時至6時30分
第三節：晚上7時30分至10時
(暫停開放時段: 中午12時至下午1時；下午6時30分至下午7時30分)

冬季(11月至3月)(只開放主池 )
第一節：上午6時30分至中午12時
第二節：下午1時至6時
第三節：晚上7時至9時30分
(暫停開放時段: 中午12 時至下午1時；下午6時至下午7時)

清潔日為逢星期一。
交通：坑口站或寶琳站

必去點3：寶康公園　多到數不完的新式遊樂設施

支持我們繼續營運

「拖手仔去街GUIDE」旅遊網一直由編輯K和M自掏腰包經營，由2016年至今已經幾年，背後並無任何BACKUP。亦由於我們不想太HARDSELL和賣廣告，一直以來極少接鱔稿JOB。

如覺得我們的資訊又用，想給我們一點鼓勵，請以PAYME或FPS打賞（SCAN QR CODE）。多多益善，少少無拘。

Payme: https://payme.hsbc/guideguidehk

FPS ID（轉數快）：0718742（姓名 HUI S*** M**）

游完水仲有精力？可以去埋鄰近的寶康公園呀！成個公園，單一主題確係「兒童公園」，一組又一組戶外兒童遊樂設施（數過過起碼有八大組）、三款鞦韆有齊。仲有個「浪漫白色燈塔」，爸爸可以幫媽媽影張靚相ROMANTIC一下。

交通：港鐵寶琳站B2出口轉左，沿行人路直行至東華三院王余家潔紀念小學轉右直行便可到達，步行約10分鐘。
鄰近大型商場：新都會中心
詳情：http://www.guideguide.hk/?p=5921

必去點4： 坑口體育館　 潛望鏡看奇妙水世界

「水世界兒童遊戲室」位於坑口體育館，同西貢將軍澳政府綜合大樓相連，都係近年落成的新式設計。如果係好食之徒，仲可以去埋「將軍澳美食村」——坑口村。（如果唔係想食好西，或者唔夠時間，坑口體育館呢個點建議可以唔去，因為仲有下一站：「調景嶺體育館」要去！）

交通：坑口地鐵站B出口，再步行約5-10分鐘。
鄰近大型商場：東港城商場、厚德商場、明德商場
詳情：http://www.guideguide.hk/?p=6018

必去點5: 調景嶺體育館　 真正動靜皆宜

小編M覺得呢度性價比高，抵玩！首先，佢好近港鐵站，經過果座標榜名家設計、好豪華的香港知專設計學院就會見到；其次，佢真係新，舊年4月先至落成；再者，除咗有室外室內的動態玩樂設施（室內就係海底世界遊戲室，有隻好大的深海潛艇；仲有中意運動的話可以book場打波）（室外就有長滑梯同埋好多體能+感官遊樂組合），仲有可以靜落嚟的圖書館！兒童圖書館的繪本、漫畫、小說又新又齊，環境又雅致，小文青必去之選。

交通：港鐵調景嶺站A出口，步行約8分鐘。

鄰近大型商場：東港城商場、厚德商場、明德商場
詳情：http://www.guideguide.hk/?p=5982

必去點6: 環保大道寵物公園

全港最大的狗公園，如果家有愛犬，同小朋友一六去放狗就最正啦！公園內的寵物飲水機及寵物沖身設備，又有草坪，都算唔錯。無乜人到，幾幽靜，環境又優美。不過亦唔係話只有狗主至啱去，因為側邊亦有單車徑，可以去果邊踩單車（唔係踩入狗公園，係側邊的單車徑），不過位置有啲隔涉，合駕駛人士或踩單車前往。另外，由於讓處無遮無擋，夏日曬起上嚟都幾攞命啊！

地點：將軍澳環保大道
開放時間：上午七時至下午九時

順便去埋之選：大坳門　放風箏、行山、BBQ、觀星  一流！

雖然大坳門在西貢不在將軍澳，但係由將軍澳過去實在太近了！所以呢兩個地方可以撈埋一日玩晒啊！
日頭去的話，詳情：http://www.guideguide.hk/?p=2527
夜晚去觀星的話，詳情：http://www.guideguide.hk/?p=2703
行山的話，詳情：http://www.guideguide.hk/?p=1734

小知識：
將軍澳究竟屬於新界區定九龍區呢？
原來以地區劃分嚟講，佢列入新界西貢區（坑口果邊同西貢巿地理環境好近）；以立法會選區嚟講呢，佢喺「新界東」裡面，同北區呀、大埔、沙田同一選區（各位爸媽，九月選舉記得投票啊）。不過喺地方行政同社區工作之上，將軍澳好多系統同網絡都係屬於「東九龍」，例如警署、消防、醫療等，港鐵將軍澳線都係連接觀塘線嘅。
將軍澳屬於第三代建設的新巿鎮，大概於上世紀80年代開始發展，同期尚有馬鞍山和埋天水圍等。大部分土地都係由JUNK BAY填海而嚟。先是起左幾條公共屋邨如寶林邨、景林邨和厚德邨等，然後陸續多咗好多個居屋屋苑，再加上港鐵將軍澳線的啟用，就更多大型私人屋苑落成，估計現時人口已達40萬人，人口密度相當之高。而且年輕家庭都唔少。